Tolypothrix tenuis J-1
Cyanobacteria › Cyanophyceae › Nostocales › Tolypothrichaceae › Tolypothrix
Сипаттамасы
Қабылдау және бөліп алу тарихы
- Шыққан елі: Қазақстан Республикасы
- Оқшаулау орны: Авангард ауылы, Жаңақорған ауданы, Қызылорда облысы
- Тіршілік ету ортасы: күріш алқаптары мен су экожүйелері
- Бөліп алғандар: Садвакасова А.К., Заядан Б.К., Қосалбаев Б.Д., Бауенова М.О. Әл-Фараби атындағы ҚазҰУ-дың биотехнология зертханасында
- Коллекцияға түскен жылы: 2022
- Соңғы анықтама: Садвакасова А.К., Заядан Б.К., Қосалбаев Б.Д., Бауенова М.О., 2023 ж.
- Бөліп алу тәсілі: табиғи үлгінің жинақтау әдісімен алынған дақылды микробиологиялық әдіспен біртіндеп себу арқылы бөліп алынды.
- Генетикалық ерекшеліктері: Табиғи түр
- Дақылдың жағдайы: аксенді
Морфологиясы мен құрылымы
Трихомалары түзу, кейде сәл иілген, қозғалмайтын, ұзындығы 68–74 мкм-ге дейін. Кей жерлерде жалған тармақталу нәтижесінде бұта тәрізді өсу байқалады, бұл көбіне гетероцисталар түзілетін аймақтарда пайда болады. Вегетативті жасушалары цилиндр тәрізді, изодиаметрлі, ашық жасыл түсті, біркелкі, түйіршіксіз, өлшемі 1,3–3,2 мкм. Гетероцисталары интеркалярлы, шар тәрізді немесе ұзарған, сары-жасыл түсті, өлшемі 3,0–5,9 × 2,3–3,2 мкм. Акинеталары жоқ. Көбеюі жасушалардың бір жазықтықта бинарлы бөлінуі арқылы жүреді. Қатты ортада сары-жасыл колониялар түзеді.
Өсіру жағдайлары
- Қоректік орталар: BG-11, Аллен, Болд (сұйық және агарланған)
- Температура: 25–30 °C
- Жарықтандыру қарқындылығы: 30–40 мкмоль фотон/м²/с
- Жарық режимі: тәулік бойы жарықтандыру
- pH: шамамен 7,0
Физиологиялық ерекшеліктері
Мезофильді гетероцисталы жіпше тәрізді цианобактерия. Жалған тармақталумен және интеркалярлы гетероцисталар түзуімен сипатталады. Акинеталар түзбейді. Азотфиксациялық потенциалы бар; ацетиленредуктазалық белсенділік тәжірибесінде көрсеткіші 2,52 ± 0,06 нмоль этилен мг⁻¹ құрғақ масса сағ⁻¹ болды.
Ұзақ мерзімді сақтау шарттары
агарланған минералды BG-11 ортасында 20 ± 2 °C температурада және әлсіз жарықтандыру жағдайында (300–500 люкс) сақталады. Сақтаудың ең ұзақ мерзімі — 2–3 ай.
Депонирлеуге қатысты ақпарат
Штамм ҚР БҒМ ҒК «Республикалық микроорганизмдер коллекциясы» ШЖҚ РМК-ға депонирленген. Коллекциялық нөмірі: RKM-0964.
Генетикалық ақпарат
16S rRNA генінің фрагменті амплификацияланған. Морфологиялық және филогенетикалық талдау нәтижелері бойынша штамм Tolypothrix tenuis J-1 ретінде идентификацияланған. GenBank нөмірі: MZ079361.
Қолданылу аясы
эксперименттік зерттеулерде қолданылады. Биотыңайтқыштар жасау, топырақты азотпен байыту, ауыл шаруашылығы дақылдарының өнімділігін арттыру, биоремедиация және альгоцианобактериялық биоқабықшалар қалыптастыру үшін перспективалы.
Библиография
- Sadvakasova A.K. et al. Influence of Mo and Fe on Photosynthetic and Nitrogenase Activities of Nitrogen-Fixing Cyanobacteria under Nitrogen Starvation. Cells. 2022; 11(5):904. DOI: 10.3390/cells11050904.
Патенттер және басқа зияткерлік меншік
Пайдалы модельге патент №8446. Өтінім №2023/0264.2, берілген күні: 16.03.2023. Жарияланған күні: 13.10.2023. Атауы: «Топырақты азотпен байыту және ауыл шаруашылығы дақылдарының өнімділігін арттыру үшін қолданылатын Tolypothrix tenuis J-1 цианобактерия штаммы». Патент иеленушісі: «Әл-Фараби атындағы Қазақ ұлттық университеті» коммерциялық емес акционерлік қоғамы. Авторлары: Садвакасова А.К., Бауенова М.О., Қосалбаев Б.Д., Заядан Б.К., Кирбаева Д.К., Ыбраи С.Н.